ПРАВИТЕЛЬСТВО Раççейри 2024 çулхи уяв тата кану кунĕсене çирĕплетнĕ. Кун пирки калакан йышăнăва РФ премьер-министрĕ Михаил Мишустин алă пуснă. Çакăн пирки августăн 18-мĕшĕнче РФ Министрсен Кабинечĕн Telegram-каналĕнче пĕлтернĕ.

Çĕнĕ çулта январĕн 6 тата 7-мĕшĕсем шăматкунпа вырсарникуна лекеççĕ. Кусем вĕсем - уяв кану кунĕсем. Çавна май вĕсене майăн 10-мĕшне тата декабрĕн 31-мĕшне куçарма йышăннă. Çапла вара Çĕнĕ çулти кану кунĕсем 10 куна тăсăлаççĕ - декабрĕн 30-мĕшĕнчен тытăнса январĕн 8-мĕшĕччен.

Май уявĕсенче апрелĕн 28-мĕшĕнчен пуçласа майăн 1-мĕшĕччен тата майăн 9-12-мĕшĕсенче канмалла пулать.

Çавăн пекех 2024 çулхи февралĕн 23-25-мĕшĕсенче, мартăн 8-10-мĕшĕсенче, ноябрĕн 3-4-мĕшĕсенче тата декабрĕн 29-31-мĕшĕсенче ĕçлемелле пулмасть. Кунсăр пуçне канмалли кунсене апрелĕн 27-мĕшĕнчен апрелĕн 29-мĕшне, ноябрĕн 2-мĕшĕнчен апрелĕн 30-мĕшне, декабрĕн 28-мĕшĕнчен декабрĕн 30-мĕшне куçарнă.