Юхмапа Пăла тăрăхĕнче ветеринарсем выльăх-чĕрлĕх отраслĕнче ерекен хăрушă чирсем ан алхасчăр, лару-тăру ку енĕпе тăнăçлă та лăпкă тăтăр тесе тăрăшаççĕ, республика тулашĕнчен инфекцисем илсе килесрен сыхланаççĕ. Ахальтен мар ĕнтĕ: "Тухтăр çынна сиплет, ветеринар - этемлĕхе", - теççĕ. Чăнах та çапла.

Эпир выльăх-чĕрлĕхе чиртен сыхлас, сыватас тĕллевпе туса илекен продукци çын пурнăçĕшĕн хăрушлăх ан кăлартăр тесе кунсерен ырми-канми тăрăшатпăр. Çакăнта муниципалитет округĕпе ял хуçалăх предприятийĕсен, фермер хуçалăхĕсен ертỹçисемпе, халăхпа килĕштерсе, ăнланса ĕçленин витĕмĕ те пысăк.

Округра мĕн пур хуçалăхра диагностика тĕпчевĕсем, ерекен чирсенчен сыхланмалли профилактика мероприятийĕсем ирттеретпĕр. Выльăх апатне, сĕт, çăмарта, аш-какай пахалăхне час-часах тĕрĕслетпĕр. Туса илнĕ продукци пахалăхĕшĕн сахал мар тăрăшатпăр.

Республикăра выльăх-чĕрлĕх отрасльне аталантарма, кĕтĕве пысăклатма ĕне-выльăха искусствăлла майпа пĕтĕлентересси - тĕп ыйтусенчен пĕри. Хальхи вăхăтра округра ку ыйтупа пирĕн патра - 8, ял хуçалăх предприятийĕсенче 6 пункт тата уйрăм предпринимательсем ĕçлеççĕ.

2024 çулхи мартăн 1-мĕшĕнчен ял хуçалăх выльăхне маркăласси саккунпа килĕшỹллĕн вăя кĕрет. Хальхи вăхăтра шăпах лашасене, ĕнесене, сыснасене маркăлас ĕç пырать. Çакă ерекен чирсенчен сыхланма, ăçта сутнине, панине йĕрлеме май парать. Выльăх-чĕрлĕх пирки информацие пĕрлехи реестра кĕртеççĕ, унта мĕнле прививкăсем, тĕрĕслев тунине палăртаççĕ.

Патăрьел муниципалитет округĕнчи патшалăх ветеринари службинче паяна 30 специалист вăй хурать. Унсăр пуçне хуçалăхсенче ветеринарин 6 ĕçченĕ пур. Коллективра чылай опыт пухнă специалистсем йышлă. Вĕсенчен ытларах пайĕ нумай çул тỹрĕ кăмăлпа тăрăшаççĕ: Кефия Акишева, Искедер Багманов, Валерий Быков, Надежда Трофимова, Елена Зверева, Сергей Пятаков, Майя Пятакова, Илсеяр Шамшетдинова. Çавăн пекех Алевтина Демидова, Екатерина Шадирякова, Анна Рыбкина, Алина Быкова, Филия Фазуллова, Татьяна Чумакова, Татьяна Семенова, Сергей Сидоров çамрăк специалистсене ырăпа палăртса хăварас килет.

Выльăх тухтăрĕсем çулсерен хăйсен квалификацине ỹстереççĕ. "Патшалăх ветеринари служби ирттерекен "Чи лайăх ветеринар" конкурса пирĕн ветеринарсем те хастар хутшăнаççĕ, пĕр-пĕрин опычĕпе паллашаççĕ. Спорт мероприятийĕсенчен те пăрăнса юлмастпăр.

Ветлечебницăсемпе ветучастоксене çĕнетессипе, пурлăхпа техника базине пуянлатассипе сахал мар ĕç тунине палăртма кăмăллă.

 Петр ЕФИМОВ, районти выльăх-чĕрлĕх чирĕсемпе кĕрешекен станци начальникĕ