Сентябрĕн 1-мĕшĕнче муниципалитет округĕнчи 3963 ача шкулсенче Пĕлỹ кунне кĕтсе илчĕ. 320 хĕрачапа арçын ачашăн вара пĕрремĕш шăнкăрав пуçласа янăрарĕ. Кашни вĕрентỹ учрежденийĕнчех линейка иртрĕ. Патăрьел муниципалитет округĕн пуçлăхĕ Рудольф Селиванов Хирти Пикшикри вăтам шкулта пулчĕ, вĕренекенсене, педагогсене, ашшĕ-амăшне çĕнĕ вĕренỹ çулĕ пуçланнă ятпа саламларĕ. Тутар Сăкăтĕнчи вăтам шкулта 164 ача вĕренме пуçларĕ. Вĕсенчен 12-шĕ пуçласа парта хушшине ларчĕ. Кунĕ хĕвеллĕ те уяр пулнăран çитĕнекен ăру çине пăхма кăмăллă. Кашнин питĕнче кулă çуталать, шкулшăн тунсăхлани палăрать.

Ачасене, педагогсене, вĕрентỹ ĕçĕн ветеранĕсене, ашшĕ- амăшне, килнĕ хăнасене шкул директорĕ Гелнур Сабитова саламларĕ. Çитĕнекен ăрăва хăтлă та капмар шкулта тăрăшса вĕренме сунчĕ. 100 çул ытла (1919 çулта уçăлнă) ĕçлекен пĕлỹ çуртĕнчен вĕренсе тухнăскерсем çĕршывăн тĕрлĕ кĕтесĕнче тухăçлă ĕçленине палăртрĕ. Ывăл-хĕрĕ ашшĕ- амăшĕн шанăçне тăрăшса вĕренсе тỹрре кăларасса шаннине пĕлтерчĕ.

Патăрьел муниципалитет округĕн администрацийĕн вĕрентỹ, çамрăксен политики, физкультура тата спорт управленийĕн начальникĕ Ирина Рубцова уяв ячĕпе саламланă май вĕрентỹ организацийĕ тăрăшуллисенчен пĕри пулнине, çакна шкулсене çĕнĕ вĕренỹ çулне мĕнле хатĕрленнине тĕрĕслекен комисси призлă вырăн парса хаклани çирĕплетнине палăртрĕ.

Муниципалитет округĕн депутатсен Пухăвĕн депутачĕ Зефар Сабитов пĕрремĕш класа килекенсене парне парса савăнтарчĕ. Çавăн пекех çĕнĕ вĕренỹ çулĕ пуçланнă ятпа территори пайĕн начальникĕ Динар Козлов, мечĕт представителĕ Рафик Кадыров, педагогика ĕçĕн ветеранĕ Хайдер Сабитов саламларĕç.

Тăрăшуллă ĕçченсемпе вĕренекенсем тĕрлĕ шайри чыса тивĕçрĕç. Пулас выпускниксем шкуль вальсĕ ташларĕç. Вĕсемех пĕрремĕшсене шкула илсе кĕчĕç.

 х х х

Алманчăри пĕтĕмĕшле пĕлỹ паракан тĕп шкулта çĕнĕ вĕренỹ çулĕ пуçланнă ятпа шкул директорĕ Лариса Хадарова, Патăрьел муниципалитет округĕн администрацийĕн вĕрентỹ, çамрăксен политики, физкультура тата спорт управленийĕн начальникĕ Ирина Рубцова, территори пайĕн начальникĕ Владимир Киргизов, муниципалитет округĕн депутатсен Пухăвĕн депутачĕ Александр Петров саламларĕç. Александр Петрович тата тăххăрмĕш класра вĕренекенсем пуçласа парта хушшине ларакансене парнесемпе савăнтарчĕç.

 9 класри Анастасия Аппаковăпа 1 класри Демид Гаврилов пĕрремĕш шăнкăрав пачĕç.

Альбина АСТРАХАНЦЕВА