ВАТТИСЕМ калашле, ултавçăн ури саккăр. Вăл кирек мĕнле лару-тăрура та такăнмасăр чуптарма, çынсене улталама пултарать. Хальхи вăхăтра пурне те пăшăрхантаракан Интернет-мошенниксем ку тĕлĕшпе çулсеренех опытне пуянлатса çеç пыраççĕ темелле. Çакна ултавçăсем кашни кун тенĕ пекех çынсене телефон шăнкăравĕсемпе шанăçа кĕрсе вĕсене чике тăршшĕ лартнă, нумай укçа-тенкĕ çухатнă тĕслĕхсем те çирĕплетеççĕ. Çынсем вара палламан çынсемпе çывăх калаçни, вĕсене банк карттин вăрттăн паллисене калани шалт тĕлĕнтерет. Телефон е интернет ултавçисенчен пăрăнăр, асăрханăр!