ИРТНĔ эрнере ветеринари ĕçченĕсем професси уявне паллă турĕç. Çак кунсенчех выльăх-чĕрлĕх отраслĕн хисеплĕ специалисчĕсем хушшинче хăйсен ĕçне пысăк ăсталăхпа пурнăçласа пыракансен пултарулăхне палăртас тĕллевпе республикăри патшалăх ветеринари служби "Манăн професси - ветеринар" видеороликсен конкурсне йĕркеленĕ. Унта кашни муниципалитет округĕнченех ветеринари тухтăрĕсем хутшăннă. Юхмапа Пăла тăрăхĕн чысне Патăрьел округĕнчи выльăх-чĕрлĕх чирĕсемпе кĕрешекен станцин ветеринари тухтăрĕ Алина Быкова хỹтĕленĕ, республикăри конкурсра виççĕмĕш вырăн йышăннă. Хăйĕн профессине чун-чĕререн юратса пурнăçлакан специалист видеора чĕлхесĕр янаварсене те çын пекех сиплес, йывăр лару-тăрура вĕсене операци туса пурнăçне çăлса хăварас ĕçсенче пысăк хастарлăх кăтартни, хăйĕн профессине килĕштерни пирки уççăн каласа панă.