Сентябрĕн 3-мĕшĕнче Нăрваш Шăхалĕнче РФ тава тивĕçлĕ спорт мастерĕ, икĕ хутчен тĕнче чемпионки, Пекинри олимп вăййисен пăхăр призерĕ Ирина Калентьева ячĕпе кросс-кантри енĕпе велосипедистсен Раççей шайĕнчи ăмăртăвĕ иртнĕ. Кăткăс трассăна 100 ытла спортсмен парăнтарнă.

Ăмăртăва хутшăнакансене Патăрьел муниципалитет округĕн пуçлăхĕ Рудольф Селиванов ăнăçу, спорт каçалăкĕнче пысăк çитĕнỹ, лайăх кăтартусем суннă. Рудольф Васильевич хăйĕн сăмахĕнче Нăрваш Шăхаль çĕрĕ тава тивĕçлĕ спортсменсене, тĕнче шайĕнчи тренерсене чылай çитĕнтернине, вĕсем ку тĕлĕшпе Патăрьел муниципалитет округĕнче çеç мар, Чăваш Республикинче те ырă тĕслĕхлĕ пулнине палăртнă.

 Çавăн пекех яш-кĕрĕме "Чăваш Республикинчи велосипед спорчĕн федерацийĕ" обществăлла организацийĕн президенчĕ Иван Аверьянов, В. Ярды ячĕллĕ Шупашкарти олимп резервĕсен 7-мĕш спорт шкулĕн директорĕ Анатолий Семенов, Патăрьел муниципалитет округĕнчи депутатсен Пухăвĕн депутачĕ Николай Афанасьев, спорт ветеранĕсем те ăнăçу суннă.

Финиша малтан çитнĕ çĕнтерỹçĕсемпе призерсене медальсемпе, дипломсемпе тата хаклă парнесемпе чысланă.

 (Хамăр корр.).