ПАЯН Патăрьел муниципалитет округĕнчи шкулсенче те çĕнĕ вĕренỹ çулне йыхравласа вĕренекенсемпе вĕрентекенсемшĕн пĕрремĕш шăнкăрав янăрарĕ. Çуллахи вăрăм каникул хыççăн ачасен каллех вĕренỹ тытăмĕнчи çĕнĕлĕхсене, йĕркесене хăнăхма, пăхăнма тивĕ. Çакăнпа пĕрлех аслисемшĕн те вĕренỹ çулĕн пуçламăшĕ çул-йĕр çинче пăхăнмалли йĕркерен пикенĕ. Акă, августăн 28-мĕшĕнчен пуçласа сентябрĕн 8-мĕшĕччен республикăра "Асăрханăр - ачасем!" операци иртет. Çавна май РФ ШĔМĕн муниципалитетсем хушшинчи "Батыревский" уйрăмĕнчи ГИБДД пайĕн начальникĕ Алексей Мальцев çак тапхăрта картиш таврашĕнче, çул çинче, çуран каçакан вырăнсенче тата ытти çĕрте те водительсене уйрăмах тимлĕ пулма, асăрханма ыйтать. Çул-йĕр правилисене пурте çирĕп пăхăнни инкек-синкекрен, аварирен сирĕ.

Сăмах май каласан, çулталăк пуçланнăранпа республикăри çул-йĕр çинчи аварисенче пилĕк ачан пурнăçĕ татăлнă, 96-шĕ аманнă. Çул çинчи инкекре суранланнă ачасем пирĕн тăрăхра та пур.