ЮЛАШКИ вăхăтра Патăрьел муниципалитет округĕ çумĕнчи çул çитмен ачасен правине хỹтĕлес тĕлĕшпе тимлекен комиссин кашни ларăвĕнче тенĕ пекех 18 çул тултарман арçын ачасем транспорт хатĕрĕпе çỹреме ирĕк паракан документсăр мотоциклпа е автомашинăпа килтенех ларса тухса кайнă пирки материалсем пăхса тухаççĕ. РФ КоАПăн 12.7 статйин 1 пайĕпе килĕшỹллĕн протокол çырнă çамрăксемшĕн вара ашшĕ-амăшĕн явап тытма тивет.

 Комиссин иртнĕ ларăвĕнче те Хирти Пикшикри 16 çулхи каччă каçхине аслисене систермесĕр мотоциклпа çỹренĕ, çул-йĕр инспекторĕсен аллине çакланнă. Юрать-ха, çак тĕслĕх пăтăрмахпа вĕçленмен. Саккунпа килĕшỹллĕн ашшĕ-амăшне ачине пăхса çитерейменшĕн, тивĕçлĕ воспитани паманшăн РФ КоАПăн 5.35 статйин 1 пайĕпе айăпланă. Унсăр пуçне çемье бюджетĕнчен штраф та тỹлеме тивĕ.