Хальхи вăхăтра терроризм общество хăрушлăхĕ пулса тăчĕ. Çĕр çинче пĕр çын теприне, пĕр халăх иккĕмĕшне ăнланманни пулмалла мар.

Çитĕнекен ăру телейлĕ ỹстĕр, яланах тăнăç пурнăç, савăк кăмăл пултăр тесе 2005 çултанпа сентябрĕн 3-мĕшĕнче терроризма хирĕç кĕрешекенсен пĕр шухăшлăх кунне паллă тăватпăр. Çакна федераллă саккунпах çирĕплетнĕ. Пĕлтерĕшлĕ кун ытахальтен çуралман. 2004 çулхи сентябрĕн 1 - 3-мĕшĕсенче Çурçĕр Осетири Бесланри пĕр шкулта пулса иртнĕ хăрушă трагеди хыççăн усал юхăма хирĕç пĕр шухăшлă çынсем кар тăма пикеннĕ те. Ун чухне виççĕр ытла çын ирсĕр шухăшлă преступниксене пула куçне хунă. Вăл шутра 150 ытла ача...

Пирĕншĕн нимĕнле инкек те ют мар. Вăл никам патне те пырса ан çулăхтăр. Патăрьел муниципалитет округĕнче те терроризма хирĕçле пĕр шухăшлăх кунĕсенче - сентябрĕн 1- 4-мĕшĕсенче - кашни вĕрентỹ, социаллă культура учрежденийĕсенче, чиркỹсемпе мечĕтсенче ятарлă мероприятисем ирттерме, тĕл пулусем, калаçусем йĕркелеме палăртнă.

Террорла пулăмсене парăнтарма мар, вĕсенчен асăрханма, сыхă пулма, пăтăрмахсене ирттерсе яма ансатрах. Çавна май çĕнĕ вĕренỹ çулĕ пуçланиччен Патăрьел муниципалитет округĕн пуçлăхĕ Рудольф Селиванов округри террора хирĕç кĕрешекен комисси членĕсемпе тата яваплă ведомствăсен ертỹçисемпе, специалисчĕсемпе пĕрле шкулсенче инкек пулнине систерекен хыпарлав, пушар сигнализацийĕ, ăна парăнтармалли хатĕрсем, эвакуаци вырăнĕсем мĕнле хатĕр пулнипе, видеосăнавсем мĕнле ĕçленипе кăсăкланнă, вырăнсенче ку тĕлĕшпе яваплă çынсемпе тĕл пулса хăрушсăрлăх пирки калаçнă.

Альбина НИКОЛАЕВА