Александр Кудряшов Кĕçĕн Арапуç ялĕнче 1904 çулта çуралнă. Тăван çĕршывăн Аслă вăрçине малтанхи уйăхĕсенчех политрук пулса хăйĕн ротине çапăçăва ертсе кĕнĕ. Пĕр çырăвĕнче çапла çырнă пулнă: "Ротăна атакăна ертсе кĕретĕп. Тыткăна лекес пулсан перĕнсе вилетĕп". Чăнах та паттăр çапăçуран чĕрĕ тухайман.

 Алла хĕç пăшал тытиччен вăл маларах Чăваш Республикинчи Первомайски районне кĕрекен Кĕçĕн Арапуçсем йĕркеленĕ "Путь социализма" колхоза 3 çул ертсе пынă. РКП (б) членĕял Совет председателĕ те пулнă.

Маларах (1920-1925 çулсенче) Самар облаçĕнче извозчикра, (1925-1931 çулсенче) Иваново облаçĕнче пир-авăр фабрикинче хура ĕç тăвакан пулса, (1931-1933) Мускав облаçĕнчи Ногинскра çип фабрикинче ĕçленĕ. 25 пинлисен (рабочисене ялсене колхоз йĕркелеме янă) шучĕпе Кĕçĕн Арапуç ялне килнĕ. Ăна "Путь социализма" колхоз членне илнĕ. Çав çулах председателе суйланă.

1938-1939 çулсенче Улатăрти парти совет строительствин кĕске курсĕн курсанчĕ, Первомайски районĕн социаллă тивĕçтерỹ пайĕн заведующийĕ, ВКП (б) райкомĕн инструкторĕ пулнă. Унтан вăрçа кайнă.

 Александр Тимофеевича халăх манмасть. Çакна Октябрьски урамĕнчи 70-мĕш çуртра (халĕ унта Вячеслав Кудряшов çемйи пурăнать) меморил хăми уçни те çирĕплетет.

Мемориал хăми çинчи пустава Омскри танксен аслă училищин курсанчĕ, Украинăри ятарлă çар операцийĕнче пулнă, "Паттăрлăх" ордена тивĕçнĕ Алексей Краснов, Валентина Петрова, Василий Базманкин сирчĕç. Муниципалитетри АПК канашĕн членĕ Петр Кузнецов, КПРФ Патăрьел райкомĕн пĕрремĕш секретарĕ Николай Селиванов (вăлах ертсе пычĕ), хĕрĕ Валентина Петрова, Альбина Пестрова учитель-ветеран, Василий Григорьев, Вера Лямкина сăмах илчĕç.

Пасмана ВАÇÇИ