УЙ-ХИР ĕçĕсем вĕçленсе пынă май çулсеренех Юхмапа Пăла тăрăхĕнче те кĕр мăнтăрĕпе туй кĕрлеттерекенсем сахал мар. Ырă йăла ĕлĕк те çакнашкалах пулнă. Акă, шăп та лăп 50 çул каялла, сентябрь уйăхĕнче Тутар Сăкăтĕнчи Ферид Сафиулловичпа Феимя Нурулловна Махмутовсем, Упамсари Василий Владимировичпа Зинаида Григорьевна Козловсем, Шăхачри Николай Федоровичпа Валентина Петровна Аврелькинсем çемье çавăрнă. Çак кунсенче хисеплĕ ĕç ветеранĕсен ачисемпе мăнукĕсем çывăх çыннисене ылтăн туй ячĕпе саламлĕç.

Первомайскинчи Арсентий Николаевичпа Евдокия Андреевна Ивановсемшĕн те кăçалхи авăн уйăхĕ асра юлĕ. Вĕсем пĕр сукмакпа утма пикенни 55 çул çитет. Тутар Сăкăтĕнчи Валеевсемшĕн кĕркуннен пĕрремĕш уйăхĕнче тата пысăкрах савăнăç. Сакăр ача çуратса ура çине тăратнă Абзалетдин Гилачетдиновичпа Сания Минетулловна бриллиант туйне (60 çул) паллă тума хатĕрленеççĕ.