ЮЛАШКИ вăхăтра электронлă сигарет çеç мар, магазинсенче ку таранччен ирĕккĕн сутнă энергетик та ачасемшĕн усăллă шĕвек пулманни пирки сахал мар çыраççĕ, çакна тухтăрсем те çирĕплетеççĕ. Сывлăх сыхлавĕн специалисчĕсем ĕнентернĕ тăрăх çак шĕвекре ытти тытăмпа пĕрлех кофеин питĕ нумай-мĕн. Вăл вара çамрăксен сывлăхне сиен кỹме пултарать, чĕре таппине урăхлатать, юн пусăмне те ỹстерет иккен. Çавăнпа та кăçалхи сентябрĕн 1-мĕшĕнчен пуçласа Чăваш Енре энергетиксене сутма чарнă. Вăхăтлăха çеç мар, ку тĕлĕшпе республика ятарлă йышăну кăларнă. Ăна пăхăнман сутуçăсене вара штраф кĕтет: уйрăм çынсене 7, должноçри çынсене 30, предприяти-организацисене 50 пин тенкĕ таран.