Сентябрĕн 10-мĕшĕнче Патăрьел муниципалитет округĕнчи танк çарĕнче пулнă салтак-ветерансем ырă йăлана малалла тăсса хăйсен професси уявне паллă тунă. Çак сăлтавпа вĕсем Патăрьелĕнчи çар комиссариачĕ умĕнче вырнаçнă танк-палăк умне пуçтарăннă.

 Пухăннисене саламлама Патăрьел тата Шăмăршă районĕсен çар комиссарĕ Вячеслав Илюткин, Патăрьел муниципалитет округĕн пуçлăхĕн çумĕ - администрацин экономика, ял хуçалăх тата инвестици ĕçĕ-хĕлĕн пай пуçлăхĕ Виктор Львов, ытти хисеплĕ хăнасем хутшăннă. Тухса калаçакансем пурте танк çарĕнче службăра пулнисене, халĕ çарта тăракан çамрăксене çирĕп сывлăх, ăнăçу, тăнăç пурнăç суннă.

Мероприятинче общество пурнăçĕнчи хастар танкистсене Хисеп грамотисемпе тата Тав хучĕсемпе чысланă, палăк умне чечек кăшăлĕ хунă.

 (Хамăр корр.).