КУН пек тĕлĕнмелле хавхалану ку таранччен республикăра пулман. Çывăх вăхăтра Чăваш Енре "Урă ял" конкурс ирттереççĕ. Çĕнтернĕ яла республика хыснинчен 2 миллион тенкĕ параççĕ! Иккĕмĕш вырăншăн 1 миллион та 200 пин, виççĕмĕшшĕн - 800 пин тенкĕ. Анчах та çак тупăшушăн ялта пурăнакан кашни çын кар тăрса тăрăшмалла: сывă пурнăç йĕркине пăхăнмалла, тĕрлĕрен спорт, культура мероприятийĕсене хастар хутшăнмалла, эрех-сăра сиенĕ пирки кăсăклă семинарсемпе практикăсем ирттермелле, пур енĕпе те кăтартуллă пулмалла. Пĕрлехи вăйпа çĕнсе илнĕ кĕмĕле вара халăхпа калаçса татăлнă хыççăн ял инфратытăмне çĕнетме яма пулать.

 Конкурсăн муниципалитет шайĕнчи тапхăрĕ çывăх вăхăтрах старт илет, вăл октябрĕн 1-мĕшĕнчен пуçласа декабрĕн 31-мĕшĕччен пырать. Республикăра ăна çитес çулхи январĕн 1-мĕшĕнчен пуçласа мартăн 31-мĕшĕсенче ирттерме палăртнă. Шанас килет, Юхмапа Пăла тăрăхĕнчи 56 ялтан чи кăтартуллисем çак конкурса кăмăлтан хутшăнĕç, çĕнтерỹçĕсен йышне те кĕмелле пултăр.