Кивĕ Ахпỹртре пĕр тăван Геннадий тата Петр Рыбкинсен ячĕпе çăмăл атлетикăпа ăмăрту иртнĕ (сăн ỹкерчĕксенче унăн саманчĕсем). Унта Юхмапа Пăла тăрăхĕнчи тата Канаш, Шăмăршă, Елчĕк, Етĕрне, Йĕпреç, Комсомольски муниципалитет округĕсенчи 146 спортсмен хутшăннă.

Старта тăракансене Чăваш Республикин Патшалăх Канашĕн депутачĕ Валерий Антонов, Патăрьел муниципалитет округĕн администрацийĕн вĕрентỹ, çамрăксен политики, физкультурăпа спорт управленийĕн начальникĕ Ирина Рубцова, Геннадийпе Петр Рыбкинсем, СССР тава тивĕçлĕ спорт мастерĕ, олимп вăййисен кĕмĕл призерĕ, марафон чупассипе олимп чемпионĕ пулнă Валентина Егорова, олимп вăййисене хутшăннă, хăвăрт утассипе тĕнче чемпионĕ ятне тивĕçнĕ Алина Иванова тата ытти сумлă хăнасем çитĕнỹсем суннă.

Çăмăл атлетикăна юратакан хĕрсемпе каччăсен 1000, 800, 400 тата 300 метра парăнтарма тивнĕ.

Ăмăрту питĕ хĕрỹ иртнĕ, кашнийĕ финиша малтан кĕрессишĕн тăрăшнă. Кăтартусене пĕтĕмлетнĕ хыççăн Митта Ваçлей ячĕллĕ Первомайскинчи пĕлỹ çуртĕнче вĕренекенсен команди - пĕрремĕш, Аслă Чеменĕн - иккĕмĕш, Патăрьелĕнчи пĕрремĕш вăтам шкулăн команди виççĕмĕш вырăнсене йышăнни палăрнă.

 Çĕнтерỹçĕсемпе призерсене кубоксемпе, медальсемпе, дипломсемпе тата парнесемпе хавхалантарнă.

(Хамăр корр.)