Патăрьелĕнчи ăсталăх шкулне, унăн филиалне çỹрекен ачасем хăйсен пултарулăхне тĕрлĕ мероприятинче кăтартса савăнтараççĕ. Вĕсемсĕр концертсемпе фестивальсем сайра иртеççĕ-тĕр. Ку хутĕнче вара ачасен инçе çула тухмалла пулчĕ. Муниципалитетри тупăшуран суйласа илнĕскерсем республикăри "Чăваш Ен ĕнчи" ("Жемчужины Чувашии") фестивальте хăйсен пултарулăхне кăтартнăччĕ. Ачасен ăсталăхне хаклама Калугăран Сергей Бреус продюсер та килнĕччĕ. Унта мала тухнисем Калуга облаçĕнчи "Этномир" музей паркĕнче этнографи фестивалĕ иртнĕ çĕре хутшăнма тивĕç пулнăччĕ.

 Çĕнтерỹçĕсем инçе çула çывăхлатса Калугăна çитрĕç. Унта Чăваш Енри 14 юрăçпа вокалист хутшăнчĕ. Вăл йышран пиллĕкĕш - Патăрьел муниципалитет округĕнчи çитĕнекен ăру - Зулия Султеева (Шăнкăртамри пĕрремĕш вăтам шкул), Залина Шагаева (Хирти Пикшикри вăтам шкул), Иван Кудановпа Зарина Валеева (Патăрьелĕнчи ăсталăх шкулĕ) тата Ирке Алимова (Сăкăтри вăтам шкул).

Фестивале тĕрлĕ коллектив - ташлакансем, юрлакансем, тĕрлĕ жанрпа хăйсен ăсталăхне кăтартакансем - хутшăнчĕç. Вĕсем нумай çĕршывран килнĕ. Тĕрлĕ халăх сцена çинчен хăйĕн пултарулăхĕпе культурине кăтартрĕ. Сергей Бреус "Чăваш Ен ĕнчи" республика финалисчĕсене унти этнографи фестивальне çитме пулăшу кỹчĕ. Пирĕнннисем Этномир сцени çине тухрĕç. Сергей Николаевич ачасене паллă вырăнсене экскурсие илсе çỹрерĕ. Тĕрлĕ халăх культурипе паллашма майсем туса пачĕ. Пирĕннисем те куракансене наци тумĕсемпе, чăваш, вырăс, тутар халăх юррисемпе, Юрий Энтин паллă поэт-юрăç сăввисенчен хывнă произведенисемпе савăнтарчĕç.

 Патăрьелсем ку тăрăхра пĕрремĕш хут мар. Вĕсем пилĕк çул каялла та çитĕнỹпе таврăннă. Кăçалхи çул çỹрев те асра юлмалла иртрĕ. Пулас артистсем икĕ кунра темиçе хутчен те сцена çине тухрĕç, пĕрремĕш тата иккĕмĕш степеньлĕ лауреат ячĕсене тивĕçрĕç.

Галина РУБЦОВА, Лилия ХАСЯНОВА, Альбина АБИТОВА, ăсталăх шкулĕн преподавателĕсем