Çак кунсенче Патăрьелĕнчи "Нива" кафере "Пĕчĕк тата вăтам предпринимательлĕх" наци проекчĕпе килĕшỹллĕн "Манăн бизнес" центрпа Патăрьел муниципалитет округĕ хĕрарăм-предпринимательсемпе çавра сĕтел ирттернĕ.

Мероприятие хутшăннисем умĕнче Патăрьел муниципалитет округĕн пуçлăхĕн пĕрремĕш çумĕ Анисия Воробьева тата Пĕтĕм Раççейри "Бизнесри хĕрарăмсем" обществăлла организацин Чăваш Республикинчи председателĕ Марина Аниченкова салам сăмахĕсемпе тухса калаçнă.

Çавра сĕтел тавра йĕркеленĕ калаçу округ пурнăçне хастар хутшăнакан предпринимательсене Тав хучĕпе чысланинчен пуçланнă. Паян Патăрьел муниципалитет округĕнчи бизнес пĕрлĕхĕнче 26 процент хĕрарăм-предприниматель. Вĕсем тĕрлĕ сферăра хăйсен пултарулăхне, ăсталăхне кăтартса бизнеса аталантараççĕ. Хĕрарăм-харпăрçăсен йышĕ çулсерен ỹссе пырать.

Чăваш Енре предпринимательлĕхе аталантарма çăмăллăхлă заемсем параççĕ. Кредитсене явăçтарма гаранти фончĕ, специалистсем бизнес-план тума пулăшаççĕ тата ытти те.

Хĕрарăм-предпринимательсемпе йĕркеленĕ тĕл пулура çавăн пекех Чăваш Республикинчи пĕчĕк тата вăтам бизнеса пулăшас енĕпе ĕçлекен агенствăн ĕç тăвакан директорĕн çумĕ Александр Быченков, Чăваш Республикинче предпринимательсен прависене хỹтĕлес енĕпе ĕçлекен аппарат ертỹçи Сергей Тихонов, РФ Президенчĕ çумĕнчи халăх хуçалăхĕн тата патшалăх службин филиалĕн преподавателĕ Александр Чернов, Анна Моллегард психотерапевт, Екатерина Морскова коммуникатор харпăрçă-хĕрарăмсене ку чухне хăйсен ĕçне йĕркелесе пыма пулăшакан темăсемпе тухса калаçнă, пурне те ăнăçу суннă.

А. ЕГОРОВА