Сентябрĕн 16-мĕшĕнче йăлана кĕнĕ йĕркепе пĕтĕм Раççейĕпех "Наци кросĕ" чупу иртрĕ. Спорт мероприятине Юхмапа Пăла тăрăхĕнче пурăнакансем те çулсеренех хастар хутшăнаççĕ. Кăçал та çаплах пулчĕ.

Çак кунхине "Наци кросĕ-2023" чупăва хутшăнас текенсем Патăрьелĕнчи "Паттăр" стадиона пухăнчĕç. Вăл хăйне евĕр пысăк спорт уявĕ пекех иртрĕ. Старта тăракансем хушшинче ватти-вĕтти хăйсен пултарулăхне, хастарлăхне кăтартрĕç. Вĕсемпе пĕрлех професилле спортсменсем, сывă пурнăç йĕркине пăхăнакансем те палăртнă дистанцие кăмăлтан чупса тухрĕç. Çакна та палăртма кăмăллă: Патăрьел муниципалиет округĕнчен Раççей чупăвне спорта кăмăллакан 3600 ытла çын хутшăнчĕ.

Спорт мероприятине хутшăнакансене Патăрьел муниципалитет округĕн пуçлăхĕн пĕрремĕш çумĕ - тирпей-илем тата территорисен аталанăвĕн упавлени начальникĕ Анисия Воробьева, муниципалитет округĕн администрацийĕн вĕрентỹ, çамрăксен политики, физкультура тата спорт управленийĕн начальникĕ Ирина Рубцова, Патăрьелĕнчи пĕрремĕш вăтам шкул директорĕ, Патăрьел муниципалитет округĕнчи депутатсен Пухăвĕн депутачĕ Наталия Андреева саламларĕç, наци кросне хутшăнакансене ăнăçу, спортра пысăк çитĕнỹ тума сунчĕç.

"Наци кросĕ-2023" ăмăртăва муниципалитет округĕнчи предприяти, организаци, учреждени ертỹçисем пуçларĕç. Вĕсем хыççăн старта спорта кăмăллакансемпе профессилле спортсменсем тăчĕç. Малалла чупăва хутшăннă чи кĕçĕн спортсменсем илем кỹчĕç. Шăпăрлансем пĕринчен тепри тăрăшса чупрĕç. Наци кросĕн чи кĕçĕн спортсменки икĕ çулхи Анна Каллина пулчĕ.

ХАКЛАВ

Валерий ПЛАТОНОВ, "Паттăр" ФСК тренерĕ, ЧР физкультурăн тава тивĕçлĕ ĕçченĕ:

- Патăрьел муниципалитет округĕнче "Наци кросĕ -2023" пысăк хавхаланупа иртрĕ. Çак кунхине "Паттăр" стадионра чăн-чăн спорт уявĕ йĕркелерĕç, çанталăкĕ те уяр та хĕвеллĕ пулчĕ. Çакă пушшех кашнийĕн кăмăлне çĕклерĕ. Старта тăракансем те, спортсменсен пултарулăхне, çитĕнĕвне курма килекенсем те йышлăн пулчĕç. Кĕçĕн çулхи спортсменсенчен хăшĕ-пĕри пĕрремĕш хут старта тăчĕ пулин те ачасен çитĕнĕвĕ, хавхаланăвĕ савăнтарать.