2021 çулхи август уйăхĕнче Еншик ялĕнчен инçех мар сысна пусса тирпейлекен "Батыръ" кооператив хута кайнăччĕ. Савăнăçлă мероприятие Чăваш Республикин Пуçлăхĕ Олег Николаев та хутшăннăччĕ. Ун чухне вăл кун пек цех республикăра та пĕрре çеç пулнине каланăччĕ.

Кооператив ĕç-хĕлĕпе тĕплĕнрех паллашас, вĕсене пăшăрхантаракан ыйтусене пĕлес тĕллевпе çак кунсенче хуçалăх председателĕпе Василий Алексеевпа тата унăн çумĕпе Павел Яруковпа тĕл пултăмăр. Кунта талăкра 180-350 пуç сысна пусаççĕ, 14-30 тонна таран какай хатĕрлеççĕ. Выльăха "Авангард" пĕрлешĕвĕн "Патăрьел беконĕ" филиалтан, Мордва Республикинчен, Ульяновск, Иваново, Тамбов облаçĕсенчен тата ытти çĕртен те илсе килсе пусса тирпейлеççĕ. Продукцие Чăваш Ене çеç мар, Тутар Республикине, Чулхула, Ульяновск облаçĕсене, Мускава, Санкт-Петербурга тата ытти хуласемпе тăрăхсене ăсатаççĕ. Аш-какая ăçта вырнаçтарассипе йывăрлăх çук. Хуçалăх малалла сарăлма, ытларах тавар туса илме те хатĕр. Проектпа килĕшỹллĕн çывăх вăхăтра çурма фабрикатсем те - фарш, пельмен, котлет... - хатĕрлеме пуçăнмалла. Çакна валли майĕсем те çитеççĕ, анчах пĕр йывăрлăх пур. Кооперативра ĕçлекенсем çитмеççĕ. Паян кунта 31 вăй хуракан кирлĕ: смена ертỹçи, бухгалтер, водитель, выльăх пусакан... "Авангард" хаçат, социаллă сеть урлă та пĕлтерỹсем парса пăхнă, вакансисен ярмăрккине те хутшăннă, анчах тăрăшас кăмăллисем тупăнман.

- Шалу та пĕчĕк мар, ĕçлекенсем ăçта тата мĕнле вăй хунине кура 30-70 пин тенкĕ таран илме пултараççĕ. Цехри ĕçсене те механизацилеме, май пур таран çăмăллатма тăрăшнă. Рабочисене тумпа тивĕçтеретпĕр, вĕри апат çитеретпĕр. Хывăнма ятарлă пỹлĕм, çăвăнса тасалма душ пур. Ĕç укçипе уйăхне икĕ хутчен татăлатпăр. Пирĕн пата вăй хума килекенсенчен опыт та ыйтмастпăр, хамăрах вĕрентетпĕр, - тет Василий Владимирович. Унăн сăмахне малалла Павел Яруков тăсрĕ: "Цех çывăхĕнчи ялсенче - Еншикре, Тикешре, Тăрăнта, Кĕçĕн Патăрьелĕнче - пурăнакансем ĕçлеме килеççĕ пуль тесе шухăшланăччĕ малтан, шанни тỹрре тухмарĕ. Ытти çĕртен хăйсен машинисемпе çỹрекенсем пур. Халь çын турттармалли ятарлă машина туянтăмăр, юнашарти муниципалитет округĕсенче шырама тивет. Кĕркунне, хирсем пушансан, пирĕн пата килес текенсем пулаççĕ, анчах çуркунне çитсен татах каяççĕ. Цех çулталăкĕпех пĕр чарăнмасăр ĕçленине шута илсе пире кун пек рабочисем çырлахтармаççĕ".

 Кооператив ертỹçисемпе калаçнă хыççăн кунта вăй хуракансен шухăшне пĕлес килчĕ. Вĕсем шалу вăхăтра панине тата сахал мар хисеп алла илнине палăртрĕç. Сăмах май, пĕрремĕш çул çеç мар тăрăшаççĕ.

Кадрсем çитменнипе "Батыръ" кооперативра çеç нушаланмаççĕ. Хальхи вăхăтра "Авангард" пĕрлешĕвĕн "Патăрьел беконĕ" филиалта, "Исток" çĕр ĕç фирминче, "Звезда" кооперативра, "Батыревский" пĕрлешỹре, Ф. Тумаков, Р. Санзяпов, Л. Кузнецов фермер хуçалăхĕсенче, выльăх-чĕрлĕх чирĕсемпе кĕрешекен районти ветеринари станцинче, "Труд" хуçалăхра, "Молочные зори", "Эко Продукт", "Баракат" кооперативсенче ĕçлекенсем çитмеççĕ. Чылайăшĕнче шалу та пĕчĕк мар. Ялта ĕç çук, теме пăхатпăр чылай чухне.

 Вăй хурас текен валли пур, анчах темшĕн ĕçлес кăмăллисем сахалăн.

Ольга ПАВЛОВА