ЮЛАШКИ вăхăтра МИХ хатĕрĕсенче Чăваш Енре коронавируспа чирлекенсем йышланни пирки çыраççĕ. Маларахри эрнере çеç çак чирпе 312 çын аптăрани паллă. Чылай çынна сехĕрлентернĕ коронавируспа чирлекенсем пирĕн муниципалитет округĕнче те пур.

Патăрьелĕнчи тĕп больницăри инфекци уйрăмĕн заведующийĕ Антонина Чернова хаçат редакцине пĕлтернĕ тăрăх ку таранччен ултă çын коронавируспа чирленĕ. Вĕсенчен пĕри - çул çитмен ача. Антонина Валерьевна çанталăк кĕр енне сулăннă май ОРВИ чирĕ палăрмаллах йышланнине те пĕлтерчĕ. Çавăнпа та прививка тутарма тăрăшмалла. Хăйсене чирлĕ туякансем е чирлекенсем вирус ыттисене ертесрен маска тăхăнни, обществăлла вырăнсене тухса çỹременни те ăна малалла алхасма памĕ.