Патăрьел муниципалитет округĕн спортсменĕсем ырă хыпарсемпе савăнтарсах тăраççĕ. Первомайскинче çуралса ỹснĕ, çак ялти Митта Ваçлей ячĕпе хисепленекен шкулта пĕлỹ илнĕ Михаил Киргизов (сăн ỹкерчĕкре) çăмăл атлетикăпа "Раççей спорт мастерĕ" ятне илни çывăх çыннисемшĕн çеç мар, пуриншĕн те пысăк савăнăç.

1998 çулта çуралнă Михаил Иванович пĕчĕклех чупма юратнă. Пĕлỹ çуртĕнче ăс пухнă чухне "Паттăр" физкультурăпа спорт комплексĕнчи Лев Никитин тренер патĕнче пуçламăш утăмсем тунă, йывăрлăхсене çĕнме вĕреннĕ. Иван Яковлев ячĕллĕ Чăваш патшалăх педагогика университетĕнче вĕреннĕ тапхăрта ăсталăхне Шупашкарти олимп резервĕсен виççĕмĕш шкулĕнчи Валерий Григорьев тренер патĕнче туптанă, пĕрре мар старта тăрса палăрнă.

 Кăçал çуркунне Раççей шайĕнче туллă-сăртлă вырăнта чупассипе йĕркеленĕ ăмăртура вăл Чăваш Республикин чысне хỹтĕлекен командăра пулнă. Пысăк кăтартусемшĕн Михаил Киргизова Раççей Федерацийĕн Спорт министерствин августăн 30-мĕшĕнчи 157нг хушăвĕпе килĕшỹллĕн "Раççей спорт мастерĕ" ята панă. Сăмах май, ашшĕ те, Иван Андреевич, çăмăл атлетикăпа питĕтуслă, вăл та çак хисепе тивĕçнĕ.

Хальхи вăхăтра Михаил Киргизов çар тивĕçне пурнăçлать.

Ольга ПАВЛОВА