ЯВСАН-ЯВСАН вĕренĕн те вĕçĕ пулать, теççĕ ваттисем. МИХ хатĕрĕсенче, çавăн пекех "Авангард" хаçатра та кăçалхи август пуçламăшĕнче Шăнкăртамра палламан çынсем çĕрле маска тăхăнса кил умĕнче ларакан автомашинăсене ухтарни, питĕрмесĕр хăварнисенчен укçа-тенкĕ те вăрлани пирки çырнăччĕ. Сентябрьте пуçтах каллех çак пысăк ялтах çĕрлехи "ухатана" тухнă, чылай çынна тăкак кỹнĕ, автомашина çинчен япаласене çаратнă тата ытти те. Патăрьел территори пайĕнчи йĕрке хуралĕн сотрудникĕсем граждансенчен заявлени кĕрсенех усал ĕçе пĕр çынах тума пултарнине тĕшмĕртнĕ-ха, ăна хамăр тăрăхра тупма май килмен. Çапах та вăл хăйĕн йĕрне çухатайман.

Çак кунсенче пирĕн тăрăхра та автомашинăсене ухтарнă вăрра Чулхула облаçĕнчи çул-йĕрпе патруль службин сотрудникĕсем тытса чарнă, Краснодар крайĕнчи 32 çулхи çамрăкăн аллине тỹрех çурăм хыçне хунă. Преступник маларах та ют пурлăха вăрланăшăнах суд сакки çине пĕрре мар ларнă-мĕн.