Мĕн авалтанах çулла çуна хатĕрлеме хушнă. Ĕç нумаййине пăхмасăрах фермăсене те çанталăк ăшă чухне хĕле валли тирпейлемелле. Ыйткалама каяс мар тесен апатне те янтăламалла. Çавăн чухне çеç выльăх-чĕрлĕхрен продукци илме май пур. "Труд" хуçалăхра яланах çакна пăхăнса ĕçлеççĕ. Стенасене дезинфекциленĕ, тасатса тухнă. Территоринче те тирпейлĕх хуçаланать. Тислĕке хире тăкма пикеннĕ.

 - Ĕне-выльăх шучĕ хальхи вăхăтра 600 пуç ытла, унтан сăвăнаканни - 190 пуç. Пĕлтĕрхинчен ытларах сĕт сунине палăртса хăварас килет. 2022 çулта 8 уйăхра пĕр ĕне вăтамран 5309 килограмм паха шĕвек панăччĕ, çак тапхăртах кăçал 5343 килогрампа танлашрĕ. Светлана Шайминăпа Светлана Жукова дояркăсен сăвăм кăтартăвĕсем уйрăмах пысăк. Пушмаксемпе ĕнесене те пĕлтĕрхинчен ытларах йăхтарнă. Сăмах май, иртнĕ çул çулталăкра 100 ĕне пуçне 90 пăру илнĕ, - терĕ "Труд" хуçалăхăн тĕп зоотехникĕ, çав вăхăтрах ветеринари ĕçĕсене те пурнăçлакан Михаил Васильев. Михаил Васильевич ку сферăра çĕнĕ çын мар, 34 çул тăрăшать. Хăйне шаннă тивĕçе кăмăлтан пурнăçлать. Выльăхсем ан чирлеччĕр тесе профилактика мероприятийĕсене те вăхăтра ирттерет. Ĕнесем йывăртарах пăруланă е чирленĕ чухне талăкăн хуть хăш вăхăтĕнче те фермăна килет.

Хуçалăхра чылай çул ĕçлекенсем нумайăн. Клара Ульянова техник-осеменатор 40 çул ытла сукмак такăрлатать. Çулне кура мар вăл маттур. Ĕнесене яланах вăхăтра йăхтарма тăрăшать. Пăру илесси унран та нумай килнине питĕ лайăх пĕлет. Çавăн пекех ферма заведующийĕ Геннадий Савельев та "Труд" кооперативра мĕн çамрăкранпа вăй хурать. Пĕр вăхăт бригадирта тимленĕ, кайран пĕр тăванĕпе пĕрле пăрусем пăхнă. Яваплăхне кура ăна ертỹçĕ тивĕçне шаннă. Çăмăл мар "лава" туртма пуçланăранпа та чылай шыв-шур юхнă.

 Ĕнен сĕчĕ чĕлхи çинчине пурте лайăх пĕлетпĕр. Выльăхсене пахалăхлă тата пуян рационлă апат çитереççĕ. Сенажа, силоса, улăма, патокăна, шрота, пурра, тăвара, дробинăна тата ытти хушма витаминсене пĕрле пăтратса параççĕ. АКМ-9 смесителе кăкарнă тракторпа Анатолий Яковлев механизатор ĕçлет. Кунне икĕ хутчен вăл çимене валеçет.

Фермăра тăрăшакансене ятарлă тумпа та тивĕçтереççĕ. Пĕрлех ĕç сыхлавĕн хăрушсăрлăхĕ пирки те манмаççĕ. Пушартан сыхланмалли хатĕрсем те пур.

Ольга ПАВЛОВА