ЮХМАПА Пăла тăрăхĕнчи волонтерсен Юрий Тинюков ертсе пыракан хастар ушкăнĕ тăтăшах Украинăри ятарлă çар операцине хутшăнакан салтаксен ыйтăвĕсене тивĕçтерсе тĕрлĕ япала, апат-çимĕç тата ыттине те вĕсем патне илсе çитерет. Юлашки рейспа та вĕсем ырă кăмăллă çынсем кунтан парса янă таварсене 3-4 кун çар чаçĕсене салатнă. Вăл çеç те мар. Патăрьел хастарĕсем, ырă чунлă çынсем салтаксене блиндаж чавма та пулăшма ĕлкĕрнĕ. Хальхи вăхăтра çĕр айĕнчи хỹтлĕх вĕсене çав тери кирлĕ.

 Волонтерсен ушкăнĕ каялла яланхиллех Патăрьелсене тем пысăкăш тав тата салам сăмахĕсене илсе çитереççĕ. Хальхинче салтаксем Патăрьел муниципалитет округĕнчи тĕрлĕ сферăра тăрăшакан предпринимательсене кăмăлтан пулăшнăшăн чун-чĕререн уйрăм тав тунă. Харпăр хăй ĕçĕпе тимлекен 100е яхăн хастар ентеш-салтаксене кирлĕ япаласем туянма кар тăрса укçа-тенкĕ пуçтарнă. Пирĕн пуçарулăхпа тимлĕх, ыр кăмăллăх, алă тăсса пулăшни малашне те салтаксене çĕнтерĕве çывхартма пулăштăр, хавхалантартăр, вăй патăр...