Патăрьел муниципалитет округĕнчи агропромышленность комплексĕн ветеранĕсем октябрĕн 2-мĕшĕнче вырăна тухса канашлу ирттернĕ. Мероприятие Патăрьел муниципалитет округĕн пуçлăхĕн çумĕ - экономика, ял хуçалăх тата инвестици ĕç-хĕл пайĕн начальникĕ Виктор Львов, Алманчă территори пайĕн начальникĕ Владимир Киргизов, фермер хуçалăх ертỹçи Александр Петров, Патăрьел муниципалитет округĕнчи АПК ветеранĕсен канашĕн председателĕ Минегали Хафизов хутшăннă.

Чи малтанах ветерансем Алманчă территори пайĕнче пулнă. Территори пайĕн начальникĕ Владимир Киргизов сумлă хăнасене кĕтсе илнĕ май ялпа паллаштарнă. Çавăн пекех вĕсем краеведени музейне кĕрсе курнă, Серафим Соровский преподобнăй скитне çитсе килнĕ. Канашлăвăн иккĕмĕш пайĕ Кзыл Чишмари "Сэлэт-Батыр" центрăн залĕнче малалла тăсăлнă. Патăрьел муниципалитет округĕн пуçлăхĕн çумĕ - экономика, ял хуçалăх тата инвестици ĕç-хĕл пайĕн начальникĕ Виктор Львов вырма ĕçĕсен кăтартăвĕсем пирки кĕскен каласа панă.

Ветерансем вырăна тухса йĕркеленĕ мероприятисем пысăк пĕлтерĕшлине, пĕр-пĕринпе тĕл пулма, хăйсен опычĕпе ыттисене паллаштарма, паянхи кун ыйтăвĕсене сỹтсе явма май панине палăртнă.

Ольга ПАВЛОВА