Украинăри ятарлă çар операцине хутшăнса пуçне хунă Александр Миккана асра тытса Тикешре мини футбол спартакиади иртнĕ. Унта муниципалитет округĕнчи çичĕ вăтам шкул команди явăçнă.

 Спортсменсене ăнăçу сунса саламлама Патăрьел муниципалитет округĕн пуçлăхĕн пĕрремĕш çумĕ, хăтлăх кĕртессипе территори аталанăвĕн управленийĕн начальникĕ Анисия Воробьева, Пикшик территори пайĕн начальникĕ Владислав Краснов тата Сашăн тăванĕсем хутшăннă.

Çивĕч тупăшура Первомайскинчи вăтам шкул команди çĕнтернĕ. Хирти Пикшик шкулне çỹрекенсем иккĕмĕш вырăна тухнă. Тутар Сăкăтĕнчи вăтам шкулта вĕренекенсем виççĕмĕш вырăн йышăннă.

"Чи лайăх вратарь" ята Патăрьелĕнчи иккĕмĕш вăтам шкулти Егор Сорокин, "Чи лайăх хỹтĕлевçĕ" ята Тутар Сăкăтĕнчи вăтам шкулти Расиль Шарафутдинов, "Чи лайăх тапăнса вылякан" ята Хирти Пикшикри вăтам шкулти Ильназ Халитов, "Чи лайăх вылякан" ята Первомайскинчи вăтам шкулти Алексей Викторов çĕнсе илнĕ.

Спартакиада асра юлмалли пулăм çеç мар, шкулсем хушшинчи туслăха çирĕплетме тата ăста спортсменсене палăртма та май панă.