ПАЯНХИ кун çынсем магазинсенче, коммунналлă çăмăллăхсемшĕн татăлма, ытти ĕçре те укçа енчĕкĕпе мар, банк карттипе ытларах усă курса тỹлеççĕ. Çĕнĕлĕхе хăнăхса пытăмăр. Çак çăмăллăх ансат та, меллĕ те темелле. Çапах та электронлă енчĕке ăнсăртран çухатма та, унта-кунта мантарса хăварма та пулать. Енчен те ют çыннăн банк картти сирĕн алла çаклансан унпа усă курма, тавар туянма юрамасть! Кун пирки çийĕнчех муниципалитет округĕнчи йĕрке хуралне пĕлтермелле, карттине ĕçлеме чарса хумалла. Çапла тумасан ют çыннăн укçипе сĕмсĕррĕн тавар туянакана РФ УКăн 158 статйин 3 пайĕпе килĕшỹллĕн айăплаççĕ. Палламан çыннăн карттипе усă куракана саккун пуçран шăлмасть, ăна тăватă çултан пуçласа вунă çул таранах ирĕкрен хăтарма пултараççĕ.