Шăнкăртам вăрманĕнчи "Хĕвеллĕ" уçланкăра Вĕрентекен кунне халалланă уяв иртрĕ. Çанталăкĕ ыйтса илнĕ пекех хĕвеллĕ те уяр пулчĕ. Çакă тĕрлĕ спорт мероприятине явăçма май пачĕ.

Боулингра, вырăнтан тăрса сикессипе тата вĕрен туртассипе те пĕрремĕш вырăна Ишлĕри пĕтĕмĕшле пĕлỹ паракан тата Патăрьелĕнчи пĕрремĕш вăтам шкулсен командисем тухрĕç.

 Уяв ячĕпе вĕрентекенсене муниципалитет округĕн пуçлăхĕн социаллă ыйтăвĕсемпе ĕçлекен çумĕ, финанс пайĕн начальникĕ Светлана Чернова саламларĕ. "Вĕрентекен - сумлă, обществăна кирлĕ професси. Çак ĕçе эсир чĕре туртнипе суйласа илнĕ. Çитĕнекен ăру шăпишĕн яваплă. Кашни ачара ырă туйăм хăваратăр, пĕлỹ паратăр. Лайăх енĕсене аталантарса ĕçе юратма, шухăшлама, ăста çынсем пулма хăнăхтаратăр. Вĕсем сиртен тĕслĕх илеççĕ", - терĕ Светлана Алексеевна.

Муниципалитет администрацийĕн вĕрентỹ, çамрăксен политики, физкультурăпа спорт управленийĕн начальникĕ Ирина Рубцова вĕрентекенсене уяв ячĕпе саламласа тăрăшуллă ĕçшĕн, тимлĕхшĕн, ырăлăхшăн, пĕлỹшĕн, ăна ачасем патне çитерме пултарнишĕн, професси ăсталăхĕшĕн тав турĕ.

Ĕçтешĕсене тата кăçалхи вĕренỹ çулĕнче çак ĕçе кỹлĕннĕ çамрăк педагогсене Шăнкăртамри пĕрремĕш вăтам шкул директорĕ, муниципалитет округĕнчи депутатсен Пухăвĕн депутачĕ Гелсирень Абейдуллова саламларĕ. Çамрăксене ăста кадрсем çумне çирĕплетнине, вĕсенче пысăк шанăç пуррине палăртрĕ.

Çĕр çинчи чи хаклă çынсене - ачасене - пĕлỹ паракансен уявĕ кăмăллă иртрĕ. Сăмах илнисем пурте вĕрентекен çитĕнекен ăрăва мораль тĕлĕшĕнчен çирĕп пулма, кăмăл-сипет никĕсне хывма пулăшнине, Тăван çĕршыва юратма, йĕркелĕхе хăнăхтарнине палăртрĕç.

Тивĕçлĕрен тивĕçлисем тĕрлĕ шайри Хисеп хучĕсене илчĕç.

 Чăваш эстрада çăлтăрĕсем пухăннисене савăк юрăсемпе савăнтарчĕç.

Альбина АСТРАХАНЦЕВА