Октябрĕн 4-7-мĕшĕсенче Мускавра К.А.Тимирязев ячĕллĕ ял хуçалăх академийĕнче 25-мĕш хут "Ылтăн кĕркунне-2023" агропромышленность куравĕ иртнĕ.

Курава çулленех Раççей регионĕнчи çĕршер производитель хутшăнать, унта хальхи ял хуçалăх техникине, АПК сферинчи çĕнĕ технологисене презентацилеççĕ. Чăваш Ен делегацийĕ йышĕнче Патăрьел муниципалитет округĕн пуçлăхĕ Рудольф Селиванов ертсе пыракан ушкăн та пулнă. Куравпа пĕрлех Мускаври Тверь лапамĕнче "Ылтăн кĕркунне" апат-çимĕç фестивалĕ те ĕçлеме пуçланă. Унта 16 регион, вăл шутра пирĕн республика та, хăйсен ĕç-хĕлĕпе паллаштарнă. Юхмапа Пăла тăрăхĕнчи Решит Санзяпов фермер (сăн ỹкер- чĕкре аялти) аш-какайран хатĕрленĕ продукцие те тутанса пăхма май пулнă, нумайăшĕ хапăлласах туяннă.

Патăрьел муниципалитет округĕ лайăх аталанакан, çĕнĕ технологисене пурнăçа кĕртекен ял хуçалăх предприятийĕсемпе палăрса тăрать.

- "Ылтăн кĕркунне" курав хамăр хатĕрленĕ продукципе паллаштарма, килĕшỹсем тума, бизнеса вăйлатма май парать, - теççĕ ял хуçалăх таварĕ туса илекенсем.

(Хамăр корр.)