"АВАНГАРД" хаçатăн иртнĕ номерĕнче вулаканăмăра Шупашкарта Пĕтĕм тĕнчери кĕрешĕвĕн наци тĕсĕсен 1-мĕш вăййисенче корэш енĕпе мала тухнă ентешсемпе паллаштарнăччĕ. Пилĕк куна тăсăлнă ăмăртусенче кĕрешỹ енĕпе Юхмапа Пăла тăрăхĕн спортсменĕсем татах та тĕнче шайĕнче палăрни савăнтарать, паллах. Шăнкăртамри Булат Тукмаковпа Ильназ Кеметов 82 килограмлă атлетсем хушшинче пĕрремĕшпе иккĕмĕш вырăнсене пайланă. Сăмах май каласан, вĕсем корэш енĕпе те пьедестал картлашки çине тăма тивĕçнĕ. Çавăн пекех Ыхра Çырминчи Руслан Тазетдинов 100 килограмлисем хушшинче кĕрешỹ енĕпе иккĕмĕш вырăна тухма пултарнă. Патăрьелсен паттăрĕсем спорт каçалăкĕнче çулсеренех çитĕнỹ хыççăн çитĕнỹ тăваççĕ.