Мускавра октябрĕн 4-7-мĕшĕсенче 25-мĕш хут иртнĕ "Ылтăн кĕркунне-2023" агропромышленность куравĕнчен Патăрьелсем пушă алăпа килмен. "Пысăк пахалăхлă продукци хатĕрленĕшĕн" номинацинче Ыхра Çырминчи Решит Санзяпов фермерăн лаша какайĕнчен тунă çурма тĕтĕмленĕ кăлпасси - ылтăн, йогурт кĕмĕл медальсене тивĕçнĕ. Çакна та палăртма кăмăллă: фермер ытти çулсенче те сумлă наградăсем илнĕ.

"Красное Знамя" ял хуçалăх кооперативĕ "Выльăх-чĕрлĕх отрасльне тата ăратлăха аталантарассипе пысăк кăтартусем тунăшăн" номинацинче кĕмĕл медаль тата хисеп паллине илни савăнтарать. "Исток" çĕр ĕç фирмине те асăннă номинацинче пăхăр медальпе чысланă. Çавăн пекех "Чи лайăх потребитель кооперативĕ" номинацинче "Баракат" кооператив палăрнă, ылтăнлă пулнă.

Ольга ПАВЛОВА