Производство ертỹçи, техника наукисен кандидачĕ, Чăваш АССРĕн ял хуçалăхĕн тава тивĕçлĕ механизаторĕ, краевед, Патăрьел районĕн хисеплĕ гражданинĕ Леонтий Никифорович Раськин (15.10.1928-03.05.2021) 95 çул каялла Патăрьелĕнче çуралнă. Леонтий Раськин Çĕрпỹри ял хуçалăх техникумĕнче, Хусанти ял хуçалăх институтĕнче, Пĕтĕм Раççейри наукăпа тĕпчев технологи институчĕн (Мускав хули) аспирантуринче вĕреннĕ. Ĕç биографине "Путь Ленина" колхозра пуçланă. 1960-1961 çулсенче Ишлейри машина тăвакан заводра техника уйрăмĕн начальникĕ, 1962-1973 çулсенче Патăрьелĕнчи "Сельхозтехника" пĕрлешỹре тĕп инженер, 1973-1987 çулсенче уйрăмăн управляющийĕ пулса тăрăшнă.

 Урапаллă тракторсене юсассине çăмăллатас тĕлĕшпе тĕпчевсем ирттерсе наука ĕçĕсемпе пĕрлех пирĕн ентешĕмĕр ял хуçалăх производствин аталанăвĕпе тата районăн тăрăшуллă çыннисем пирки очерксем те çырнă. Вăл "Первопроходцы и последователи" ятлă икĕ томлă кĕнеке кăларнă.

Леонтий Раськина "Хисеп палли" орденпа, Чăваш АССРĕн Верховнăй Совечĕн Президиумĕн грамотипе наградăланă.

("Çулталăк кĕнекинчен")