Раççейри Педагог тата наставник çулталăкне халалласа муниципалитетри тĕп библиотекăра "БиблиоАнне" çамрăк çемьесен тата Чăваш Енри Аннесен канашĕн Пăлаçипе Юхма ен уйрăмĕн пуçарăвĕпе "Ăспа кан" илĕртỹллĕ мероприяти иртнĕ. Вăл "Ăçта? Мĕн? Хăçан?" тата "Ăçта логика?" мероприятисем евĕрлех пулнă. Тупăшăва Патăрьелĕнчи "Сказка", "Василек", "Солнышко", "Центральнăй" ача сачĕсенчи педагогсем явăçнă. Вĕсем пĕр раундран теприне çăмăллăн каçнă. Ыйтăвĕсем тĕрлĕ тематикăпа пулнă, истори пулăмĕсене аса илме тивнĕ. Тарăннăн шутлама пĕлни, тавçăрулăх малта тăнă.

"Кашни командăна палăртмалла. Ячĕсене те илĕртỹллĕ тупнă вĕсем. Тумĕсене те вĕсемпе çыхăнтарнă. Пĕр-пĕрне çывăх пĕлни, туслăх, ăнланма пултарни çĕнтерỹ тума пулăшрех",- тенĕ çамрăк çемьесен "БиблиоАнне" клубĕн ертỹçи Оля Моисеева вăййа пĕтĕмлетсе.

Пĕрремĕш вырăна "Сказка" тата "Солнышко", иккĕмĕшне "Центральнăй", виççĕмĕшне "Василек" ача сачĕсен ĕçченĕсем тухнă.

 Муниципалитет округĕнчи Хĕрарăмсен канашĕн председателĕ Алена Горшкова вĕсене Тав çырăвĕсемпе чысланă.

Альбина ИВАНОВА