"Пушкин картти" Раççей проекчĕпе килĕшỹллĕн тата "Çамрăксем - сывă пурнăç йĕркишĕн" уйăхлăхпа çыхăнтарса муниципалитетри тĕп библиотекăра "Ровесник" клуба çỹрекен Патăрьелĕнчи агропромышленность техникумĕн пĕрремĕш курсĕнче вĕренекенĕсем (педагогĕ Любовь Лаврентьева) "Сывлăх лапамĕ" илĕртỹллĕ вăййа хутшăнчĕç. Мероприятире муниципалитетăн тĕп больница психологĕ Светлана Ибетова студентсене "Сывлăх" наци проекчĕпе çыхăнтарса сывлăха мĕнле упрамалли çинчен каласа кăтартрĕ. "Сывлăх вăл - тĕп пуянлăх. Сывлăхлă чухне çеç çын хăйне телейлĕ туять. Çĕр çинче пурăннă кашни кун ăна хавхалану кỹрет",- терĕ вăл.

Унтан çитĕнекен ăру библиотека ĕçченĕсем хатĕрленĕ вăййăн тĕрлĕ станцийĕпе тухрĕ. Кунта вĕсене тавçăрулăх та, пĕлỹлĕх те, спорта юратни те кирлĕ пулчĕ. Командăсем пурте хастар пулчĕç. "Антибиотики" ушкăн çĕнтерчĕ. Иккĕмĕш вырăна "Витаминсем" тата "ЗОШники" пайларĕç. Виççĕмĕшĕнче "Витамин С" пулчĕ.

Ольга МОИСЕЕВА