Иртнĕ шăмакун, октябрĕн14-мĕшĕнче, Шупашкарти Çеçпĕл Мишши ячĕллĕ Çамрăксен театрĕнче Патăрьелсен ентешлĕх уявĕ иртнĕ. Хаклă тĕл пулăва хапăл тунисене Патăрьел ентешлĕхĕн ертỹçипе Александр Мироновпа пĕрлех Чăваш Республикин Патшалăх Канашĕн депутачĕсем Валерий Антоновпа Олег Мешков саламланă, малашне те ырă йăлана малалла тăсса пĕрлехи вăйпа тăрăшма, канма, усăллă та пуçаруллă ĕçсем тума каланă.

Яланхи пекех тĕп хуламăрти Патăрьелсен ентешлĕхĕн уявне Патăрьел муниципалитет округĕн пуçлăхĕ Рудольф Селиванов ертсе пыракан ушкăн та хутшăннă. Рудольф Васильевич ентешсене уяв ячĕпе саламланă, хамăрăн пĕчĕк çĕршывăмăра асран кăлармасăр пулăшса пыракан хастарсене тав тунă.

Уява ăш-пиллĕ калаçусăр пуçне савăк юрă-ташă, алă ĕç ăстисен куравĕ илем кỹнĕ. Патăрьелсен культура мероприятине Пăлапуç Пашьелĕнчи халăх фольклор ушкăнĕ (ертỹçи- Зот Степанов), Пузырниковсен çемье ансамблĕ тата ыттисем хутшăнса ентешсене сцена çинчен саламланă.

А. НИКОЛАЕВА