ПАТĂРЬЕЛ муниципалитет округĕ çумĕнчи çул çитмен ачасен правине хỹтĕлес тĕлĕшпе тимлекен комиссин черетлĕ ларăвĕнче 18 çул тултарман çамрăксем административлă право йĕркине пăхăнман тĕслĕхпе çыхăннă ĕçсене пăхса тухнă. Акă, Анат Тăрмăшĕнчи çул çитмен çамрăк кỹршĕ ялти хăйĕнчен аслă каччă сĕннипе тата илентернипе çĕрле Патăрьелĕнче сăра ĕçсе хĕрĕнкĕленнĕ, палламан çынсемпе çапăçнă та. Юрать-ха, хирĕç тăру инкекпе вĕçленмен. Йĕрке хуралçисем вĕсене тытса чарнă. Комиссинче арçын ачана сăра сĕнсе ĕçтерекене те, çул çитмен çамрăка та РФ административлă право йĕркине пăсни çинчен калакан Кодексăн статйисемпе штраф тỹлеттернĕ.

Асăрхаттаратпăр: октябрĕн 1-мĕшĕнчен пуçласа 16 çул тултарман ачасен каçхине 22.00 сехетран пуçласа ашшĕ-амăшĕсĕр е аслисемсĕр обществăлла вырăнта çỹреме юрамасть! Çакăншăн ашшĕ-амăшĕнех явап тытма тивет.