Хусан ипподромĕнче лаша спортне юратакансен Раççей шайĕнчи ăмăртăвĕ иртнĕ. Унта çĕршыври тĕрлĕ регионтан чи вăйлă чупакан урхамахсем хутшăнни пысăк пĕлтерĕшлĕ. "Тутарстан призĕ" чупура Патăрьелĕнчи "Паттăр" спорт шкулта инструктор пулса ĕçлекен Алексей Краснов "Исток" çĕр ĕç фирмин урхамахĕпе 3200 метрлă дистанцире начар мар кăтарту тунă, финиша иккĕмĕш кĕнĕ. "Уникс" çак хушша пĕрремĕш хут парăнтарнă. Унăн вăхăчĕ 4 минут та 16 секкунд. Пилĕк çулхи урхамахшăн çакă пысăк çитĕнỹ.

 Тепĕр чупура Тикеш ялĕнче çуралса ỹснĕ, халĕ Çĕнĕ Шупашкарти лаша спорт шкулĕн директорĕнче вăй хуракан Валерий Краснов "Флюит" çамрăк урхамахĕпе 2400 метрлă дистанцире призерсен йышне кĕнĕ. Шанас килет, малашнехи ăмăртусенче спорт ветеранĕсем çамрăк урхамахсемпе тата лайăхрах çитĕнỹсемпе савăнтарĕç.

 Çакăнтах Кивĕ Ахпỹртре çуралса ỹснĕ, Шупашкарта пурăнакан пĕрремĕш категориллĕ Николай Пыркин урхамахçă хăйĕн "Марс" лашипе хутшăнни те кăмăллă.

 Халĕ округри лаша спортне юратакансем урхамахĕсене хĕллехи ăмăртусене хатĕр-леççĕ.

Николай КРАСНОВ