Патăрьелĕнчи иккĕмĕш вăтам шкул инновациллĕ программăсене пурнăçа ăнăçлă кĕртнĕрен 500 пин тенкĕ грант çĕнсе илчĕ. Çакăншăн хĕпĕртемелĕх пурах. Мала тухас, гранта тивĕçес тесен ялан шыравра пулмалла, мĕн те пулин çĕннине кĕртме тăрăшмалла.

Çĕнĕлĕхĕсем ку шкулта чылай. Агрокласра вĕренекенсем хăйсен малашлăх çулне маларахах палăртаççĕ. Пурте хăйсен пурнăçне çак çул-йĕрпе çыхăнтармасан та.

 Коллектив вара "Вĕрентỹ" наци проекчĕн тепĕр çул-йĕрĕ çине тăчĕ. Кашни ачара çитĕнỹ курасшăн. Вĕсене уроксенче пĕлỹ панисĕр пуçне хушма занятисене явăçтарасшăн. 100 проценчĕпех. Çĕнĕлĕхсене çул параççĕ. Акă, "Код будущего" проект информаци технологийĕсен профессийĕсемпе паллашма май парать. Суйласа илнĕ енĕпе пĕлĕве тарăнлатма ансат. Программа тумалли "чĕлхене" вĕренни ОГЭ тата ЕГЭ тытнă чухне те пулăшать.

 "Билет в будущее" ачасен пултарулăхне палăртакан проект. Çавна май федераци шайĕнче ирттернĕ тупăшăва хутшăнчĕç. 2019 çулта 9 класра вĕренекенсем онлайн мелĕпе тест ыйтăвĕсем çине хуравларĕç. Пĕр çак предметпа çеç пулмарĕ тĕрĕслев. Математикăпа 1000 балл пухма май пур çĕртен 639 бала çитерчĕç. Вулав пĕлỹлĕхĕпе 500 ытла балл пухăнчĕ. Биологипе каллех çав шая çитейрĕç. Республикăри темиçе вĕренỹ учрежденийĕ хутшăннăччĕ унта. Малти пилĕк вырăн йышăннисен йышне кĕме пултарчĕç. Шкул директорне Людмила Лялинăна Раççей Федерацийĕн вĕренỹ министрĕ Сергей Кравцов Тав хучĕ панăччĕ.

Функционаллă пĕлỹлĕх мĕн вĕреннине пурнăçра усă курма хăнăхтарать. Вĕсен программисем пур, тĕллевĕсем паллă. Мĕн те пулин çĕнни шырамалла.

Хушма занятисенче биологине тĕплĕнрех алла илме тĕллев лартрĕç.

Камăн мĕнле çĕнĕлĕх пур çавăнпа интересленеççĕ. Класс ертỹçисем кашни кĕçнерникун профориентаци темипе калаçусем ирттереççĕ. Ачасен интересĕ те пысăк. Алсу Шадаева, Наталия Никитина, Татьяна Родионова педагог навигаторсемпе вĕсем программăсем хатĕрлеме хăнăхаççĕ. 6-11 класра вĕренекен 65 ача явăçать вĕсене.

 - Хамăр пултарулăха кăтартас тесе электронлă майпа республика конкурсне "Вĕрентỹ" наци проекчĕпе çыхăнтарса çĕнĕлĕхсем кĕртсе тунă ĕçсене çутатакан материалсем тăратрăмăр. 58 заявка пулнă унта. Шкулсенчен эпир те çĕнтерỹçĕсен йышне кĕтĕмĕр. Инновациллĕ программăсене хастар ĕçе кĕртнĕшĕн тата пысăк çитĕнỹсемшĕн Республика Пуçлăхĕн грантне тивĕçрĕмĕр. Унпа биолаборатори илесшĕн. Ял ачисем те сăнавсем туса мĕн çитĕнтерме пултарнине пĕлччĕр. Пирĕн ĕçе Раççей Федерацийĕнчи Педагог тата наставник çулталăкĕнче çапла хак пани питех кăмăллă та пулчĕ,- тет шкул директорĕ Людмила Лялина.

Альбина АСТРАХАНЦЕВА