ÇЫННА ырă туни нихăçан та харама каймасть. Ыр кăмăллăх ырма та, ывăнма та памасть. Çакна Патăрьелĕнчи Юрий Тинюков волонтер ертсе пыракан хастарсем çирĕплетсех калама пултараççĕ. Акă, Çĕньял территори пайĕн (ертỹçи Мария Мадюкова) хастарĕсем темиçе уйăх ĕнтĕ пĕр чарăнми Украинăри ятарлă çар операцине хутшăнакан салтаксем валли хỹтĕлев сеткине çыхаççĕ. Çак кунсенче гуманитари пулăшăвĕпе çула тухакан волонтерсем патне вĕсем каллех 5х15 калăпăшлă пĕр, 5х7,5 калăпăшлă икĕ сетка çитернĕ. Юлашки вăхăтра ку тĕлĕшпе Шăхач, Аслă Чемен, Турхан ял тăрăхĕсем, предпринимательсем, ытти уйрăм çынсем те хамăрăн салтаксемшĕн кар тăрса пулăшнине палăртмалла.