Шкул театрĕсен "Асам" фестивалĕ кăçал республикăра пĕрремĕш хут иртет. Чăваш Енре паянхи кун вĕренỹ учрежденийĕсен çумĕнче 350 театр студийĕ ĕçлет. Раççей Федерацийĕн çут ĕç министрĕ Сергей Кравцов 2024 çул тĕлне кашни шкулăн хăйĕн театрĕ пулмалли çинчен каланă.

Фестивале Чăваш Енри Телейлĕ Ачалăх çулталăкне халалланă. Унăн кураторĕ - Раççей Федерацийĕн Патшалăх Думин депутачĕ Алла Салаева.

Конкурс икĕ тапхăрпа иртет: муниципалитет тата республика шайĕнче. Муниципалитет шайĕнче çĕнтернĕ шкул театрĕсем ноябрь уйăхĕнче Шупашкарти театрсен сцени çинче ăмăртĕç.

Константин Иванов ячĕллĕ Чăваш патшалăх академи драма театрĕнче Шупашкар, Йĕпреç, Патăрьел, Вăрнар муниципалитет округĕсенчи шкул театрĕсем хăйсен пултарулăхĕпе паллаштарĕç. Ноябрĕн 11-мĕшĕнче Патăрьелсем сцена çине тухĕç. Вĕсен ăсталăхне Чăваш Енри театрсен ертỹçисемпе паллă артистсем хаклĕç. Чи маттуррисене суйласа илсе декабрĕн 8-мĕшĕнче Трактор тăвакансен керменĕнче чыслаççĕ.

Муниципалитет шайĕнчи конкурсра çĕнтерỹçĕ пулнă Шăнкăртамри пĕрремĕш вăтам шкул театрне çỹрекенсем халĕ республика фестивальне хатĕрленеççĕ. Вĕсем "Сăр шурăмпуçĕ лăпкă..." (ертỹçи Гузель Вахитова) театрализациленĕ представленипе тухнăччĕ. Унта Сăр тата Хусан хỹтĕлев чиккисене тунă чухнехи саманта сăнланă. Çак ĕçе ялтан хутшăннă çынсене аса илнĕ. Слайдсем кăтартса пыни Тăван çĕршывăн Аслă вăрçинче çĕнтерĕве çывхартма хутшăннисен паттăрлăхне тата витĕмлĕ кăтартма май панăччĕ. Çамрăк артистсем тăрăшса выляни куракансен куççулĕнче те палăрнăччĕ.

Альбина АСТРАХАНЦЕВА