Пурнăçра шăл тухтăрĕ патне кĕмен çын сайра-тăр. Пĕри ун патне сиплев илме, иккĕмĕшĕ канашлама, виççĕмĕшĕ кăларттарма, тепри пачах ларттарма лекет. Шăл çирĕп тата ыратман çынсене телейлех тесе калас килет. Тухтăр патне лекекенсен те кăмăлĕ пăсăлмасть. Патăрьел муниципалитет округĕнчи тĕп больницăри ĕçченсем шăпах "Сывлăх сыхлавĕ" наци проектчĕн тĕп пайĕсенчен пĕрне - ялта пурăнакансене медицина пулăшăвĕпе тивĕçтерессине - лайăхлатассине тимлеççĕ. Пурин те ĕç стажĕ пĕчĕк мар вĕсен. Пациентсене пĕрремĕш тата аслă категориллĕ специалистсем йышăнаççĕ. Çакна Раççей Федерацийĕнчи стоматологи ассоциацийĕн Чăваш Республикинчи уйрăмĕн "Чăваш Енри стоматологи - аталану çулĕ тата професси ăсталăхне ỹстермелли платформа" темăпа Шупашкарта иртнĕ наукăпа практика конференцийĕнче илнĕ чыслав та çирĕплетет. Унта çĕршывăн тĕрлĕ регионĕнчен специалистсем хутшăннă. Çĕнĕ технологисене ĕçе кĕртмелли майсене, юлашки çулсенче тунă çитĕнỹсене сỹтсе явнă.

Тĕп больницăри стоматологи уйрăмне 2002 çултанпа Антонина Сандыркина тухтăр ертсе пырать. Алексей Емельянов, Анатолий Казачков, Николай Секретов, Чулпан Багманова специалистсем пурте Илья Ульянов ячĕллĕ Чăваш патшалăх университетĕнчен вĕренсе тухнă хыççăн килнĕ.

Çакă кăмăллă: тĕп больницăн стоматологи уйрăмне ассоциацин тав çырăвне панă. Анатолий Петровича, Алексей Пантелеймоновича, Николай Владимировича тата Чулпан Минсагировнăна медальпе наградăланă. Çак чыса Антонина Антоновна чылай маларах тивĕçнĕ пулнă. Çитĕнỹшĕн хĕпĕртемелĕх пур.

 Альбина АСТРАХАНЦЕВА