Шупашкарти "Спартак" стадионта Чăваш Енре футболла выляса мала тухассишĕн вăйăсем иртнĕ. Финалти тупăшăва Патăрьелĕнчи "БТВ" тата Шупашкарти футбол спорт шкулĕн командисем тухнă. Пĕрремĕш тайм Патăрьелсем 2:0 шутпа çĕнтернипе вĕçленнĕ. Иккĕмĕшĕнче 2:2 пулнă. Пенальти тапса вара Шупашкар команди çĕнтернĕ. Пирĕннисене кĕмĕл медаль тивĕçнĕ. Çак чыса виççĕмĕш çул алăран ямастпăр.

Сезон вăрăм пулчĕ. Çак хушăра сахал мар ĕç тунă, вăй-хал та кĕрсех тăнă, хавхалану ỹссех пынă.

Палăртрăмăр ĕнтĕ, пĕрремĕш вырăнта Шупашкарти футбол спорт шкулĕн команди, иккĕмĕшĕнче Патăрьел муниципалитет округĕн "БТВ" ушкăнĕ, виççĕмĕшĕнче тĕп хулари футбол спорт шкулĕн "Волга-Тав" каччисем.

Чăваш Республикин Патшалăх Канашĕн депутатне Валерий Антонова спортсменсем муниципалитетри футбол клубне тытса тăма пулăшнăшăн ырăпа палăртаççĕ.