Çула тухакан автомашина çулталăкăн кирек хăш вăхăтĕнче те юсавлă, шанчăклă пулни пĕлтерĕшлĕ. Çапах та тепĕр чухне çанталăк условийĕ те водительсем çул-йĕр правилине пăхăннине тĕрĕслет темелле. Халĕшăпах урамра çакнашкал вăхăт.

Раççей Правительствин йышăнăвĕпе килĕшỹллĕн 2023 çулхи сентябрĕн 1-мĕшĕнчен пуçласа автомашина çинче çакăн пек çитменлĕхсем пулсан çула тухма, унпа усă курма юрамасть: çуллахи вăхăтра (июнь, июль, август) автомашина шини шипаллă, хĕллехи тапхăрта (декабрь, январь, февраль) кустăрмасем çуллахи резинăпа е кустăрмисене пĕтĕмпех хĕллехи резинăпа улăштарман пулсан.

 Çавăн пекех çĕнĕ йышăнупа килĕшỹллĕн руль управленине вăйлатмалли гидросистемăра шĕвек сăрхăнни, юхни е антиблокировка тормоз системи (АВS) юсавсăр пулни те водительшĕн çула тухма чаракан сăлтавсем пулмалла.

Ỹсĕре çул-йĕр те юратмасть!

2023 çулхи тăхăр уйăхра Патăрьел муниципалитет округĕн территоринче 29 (иртнĕ çулхи çак тапхăрта 27) авари пулнă. Вĕсенче икĕ çыннăн пурнăçĕ татăлнă, 41-ĕн аманнă.

Аварисен ытларах пайĕ руль умĕнчи çынсем ỹсĕр пулнипе çыхăннă. Çакă, паллах, пăшăрхантарать те, шухăшлаттарать те. Иртнĕ çул çакнашкал 7 тĕслĕхе шута илнĕ пулсан, кăçалхи тăхăр уйăхра 11 водителе асăннă сăлтавпа явап тыттарнă.

Çак тапхăрта çуран пыракан çине автомашинăпа кĕрсе кайнипе 5, çул урлă каçмалли вырăнта 1, çуран пыракан çул-йĕр правилине пăхăнманран 2, хирĕç килекен транспорт çулĕ çине тухнипе 7 авари пулнă.

Тепĕр пăшăрхантаракан ыйту - аварисене çул çитмен ачасем хутшăнни. Шел пулин те, тăхăр уйăхра тăхăр ача инкек тỹснĕ.

Алексей МАЛЬЦЕВ, РФ ШĔМĕн муниципалитетсем хушшинчи "Батыревский" уйрăмĕн ГИБДД пайĕн начальникĕ