"Сирĕн вĕренекенĕре, Литература фестивалĕнче тĕнче поэзийĕнче çĕнĕ жанр - амфистроф - уçнăшăн Ылтăн медальпе чысларĕç. (Амфистроф - сăвă ик енчен те вуланать, анчах вĕçĕнчен пуçламăш енчен вуласан урăх сăвă пулса тухать)", - çакнашкал СМСкăна республикăра çеç мар, тĕнче шайне çĕкленнĕ хисеплĕ те пултаруллă чăваш поэтĕнчен уçса вулама çав тери кăмăллă пулчĕ. Çавăнпа та Марина Карягинăна çак ятпа чун- чĕререн саламларăм.

Пирĕн ентешĕмĕр, чăвашлăхшăн, унăн чĕвĕлти чĕлхишĕн, йăли-йĕркине упраса хăварассишшĕн чун-чĕререн хыпса çунакан паллă поэтăмăр, прозаик, драматург, пултаруллă тележурналист, кино режиссер юлашки çулсенче литература каçалăкĕнче çĕнĕрен те çĕнĕ сăвăсемпе, юмах-калавпа, тарăн сюжетлă кинофильмсем ỹкернипе вулаканпа куракана тыткăнлать. Халĕ, акă, каллех поэт "пьедесталăн" чи çỹллĕ картлашки çине тăма тивĕçнĕ. Çак кунсенче Хусанта Пĕтĕм Раççейри "Лиффт" литература фестивалĕнче пирĕн ентешĕмĕре тĕнче поэзийĕнче çĕнĕ жанр - амфистроф - уçнăшăн Ылтăн медальпе чысланă! Кунтах Мускаври Александр Куприн режиссерăн-поэтăн иксĕлми пултарулăхĕ пирки ỹкернĕ "Амфистроф. Встречное течение" фильмне те сỹтсе явнă.

"Амфистроф - чăннипех те тĕлĕнмелле жанр. Тĕнче поэзийĕнче кун пек çыракан халиччен пулман",- çапла хак панă фестиваль йĕркелỹçи, Еврази халăхсен Ассамблейинчи литература канашĕн ертỹçи, Пĕтĕм тĕнчери писательсен "WOW" организацийĕн президенчĕ Маргарита Аль.

Раççейри писательсен тата Раççейри кинематографистсен союзĕн членĕ Марина Карягина пирки поэзи каçалăкĕнче "çĕнĕ çĕр уçакан" тесен те йăнăш мар. Тĕнче поэзийĕнче амфистроф халиччен пулман. Çак сăмах хальлĕхе словарьте те çук (тен, малашне кĕрĕ). Çĕнĕ жанрпа ĕçлеме çăмăл мар пулин те сăмах ăстин сăввисем сулахайран сылтăмалла та, сылтăмран сулахаялла та питĕ çăмăл вуланаççĕ, çав вăхăтрах тарăн шухăшлă та.

Сăмах май каласан, "Лиффт" фестиваль йĕрки тăрăх, унăн ялавне ылтăн лауреата параççĕ. Хальхинче ăна пирĕн ентешĕмĕр, Кивĕ Ахпỹрт пики тивĕçнĕ. Çавăнпа та çитес çул çакнашкал пысăк фестиваль Чăваш Енре иртĕ.

Альбина ЕГОРОВА