Раççейре пурăнакансене физкультурăпа тата спортпа туслаштарасси "Демографи" наци проекчĕн "Спорт - пурнăç йĕрки" федераци проекчĕн тĕп тĕллевĕсенчен пĕри пулса тăрать.

Палăртнине пурнăçа кĕртме муниципалитет округĕнче тăтăшах тĕрлĕ енлĕ ăмăртусем иртни те уççăн çирĕплетет. Çĕнтерỹçĕсем республика, Раççей шайне тухаççĕ. Спорт мастерĕсен, вĕсен кандидачĕсен йышĕ хушăнни те савăнтарать. Çамрăксене çитĕнỹ тума вырăнта спорт секцийĕсем ĕçлени те пулăшать. Ку хутĕнче вара Патăрьелĕнчи пĕрремĕш вăтам шкулта Раççей Федерацийĕн спорт министерстви пулăшăвĕпе "Самбо - шкула" вĕрентỹпе спорт проекчĕ ĕçе кĕчĕ. Вăл шкулсенчи спортăн çак енне аталантарма, сывлăха çирĕплетме, ачасене хăйсене хăйсем хỹтĕлеме хăнăхма пулăшĕ.

Вĕренỹ çуртĕнче занятисене ирттерме ятарлă зал уçнă. Кăçалхи вĕренỹ çулĕнче 6 ролл-мат илме укçа уйăрнă. Пĕрремĕш чĕрĕкĕн юлашки кунĕнче Патăрьел муниципалитет округĕн пуçлăхĕ Рудольф Селиванов шкулти самбо занятине çитсе курчĕ. Алмаз Сафиянов тренер-преподаватель пулăшнипе иккĕмĕш классем пĕрремĕш хăнăхусене мĕнле алла илнипе паллашрĕ Çакă ачасенче ырă туйăмсем çуратрĕ, вăй-хал кĕме пулăшрĕ. Тренер вĕсене хăйсене хỹтĕленмелли мелсене хăнăхтарать. Кашни класс эрнере пĕрер сехет занятинче пулмалла.

 "Патăрьелĕнчи пĕрремĕш вăтам шкултан та чăн-чăн патриотсем тухасса шансах тăрас килет. Вĕсем хăйсен çемйине, Тăван çĕршыва хỹтĕлеме пултарччăр", - терĕ Рудольф Васильевич.

Самбо - массăллă спорт тĕсĕ. Вăл чăтăмлăха, çаврăнăçулăха, пиçĕлĕхе, вăй-хала ỹстерет. Характера çирĕплетме, пурнăçри тĕллевсем патне çитме пулăшать.

Секци уçăлнă ятпа çитĕнекен ăрăва çавăн пекех администрацин вĕрентỹ, çамрăксен политики тата физкультурăпа спорт управленийĕн начальникĕ Ирина Рубцова, шкул директорĕ Наталия Андреева та саламларĕç.

Альбина ИВАНОВА