ПАТĂРЬЕЛĔНЧИ централизациленĕ клуб системин артисчĕсем, культура вучахĕ çумĕнчи Раççей тата Чăваш Республикин культурăн тава тивĕçлĕ ĕçченĕ Анатолий Шакин нумай çул хушши ертсе пыракан юрăпа ташă халăх ансамблĕн сцена ăстисем нумай пулмасть çеç Юхмапа Пăла тăрăхĕнчи хисеплĕ ĕç ветеранĕсене Ваттисен кунĕпе саламласа пуян концертпа савăнтарчĕç. Хальхинче муниципалитет округĕнчи культура ĕçченĕсем Юхмапа Пăла тăрăхĕнче пурăнакансене Халăх пĕрлĕхĕн кунĕ ячĕпе ноябрĕн 3-мĕшĕнче çакнашкал савăнăç кỹресшĕн. Уяв концерчĕ Патăрьелĕнчи культурăпа кану центрĕнче 18 сехетре пуçланать. Централизациленĕ клуб системин директорĕ Наталия Алексеева хаçат редакцине пĕлтернĕ тăрăх, "Вместе мы едины" ятпа иртекен концертра чăваш, вырăс, тутар халăхĕсен юрри-ташши куракан кăмăлне çĕклĕ. Патăрьелĕн сцена ăстисен пултарулăхне курма çемьепе те, ушкăнпа та хапăл туса кĕтеççĕ. Концерт тỹлевсĕрех пулать. Сăмах май каласан, пирĕн культура ĕçченĕсен юрри-ташши муниципалитет округĕнче иртекен кирек мĕнле мероприятие те илем кỹрет.