Çак кунсенче Патăрьел муниципалитет округĕнче нумай хваттерлĕ çуртсен çĕнĕ организацин управляющине палăртнă. Конкурс пĕтĕмлетĕвĕ пирки Патăрьел муниципалитет округĕн пуçлăхĕн пĕрремĕш çумĕ - хăтлăх кĕртессипе территорисен аталанăвĕн управленийĕн начальникĕ Анисия Воробьева акă мĕн пĕлтерчĕ:

- Патăрьелĕнче нумай хваттерлĕ çуртсене пăхса тăракан "Чистое село" компанин лицензийĕ вĕçленнĕрен сентябрĕн 14-мĕшĕнче компани управляющине суйласа илме уçă конкурс пĕлтертĕмĕр. Октябрĕн 23-мĕшĕнче Патăрьел муниципалитет округĕнче нумай хваттерлĕ пурăнмалли çуртсен управляющийĕ кам пулни палăрчĕ. Конкурс çĕнтерỹçи - "Управляющая компания "Управление МКД" тулли мар яваплă пĕрлешỹ. Унăн учредителĕ - Сергей Антонов.

Унта муниципалитет округĕнчи 77 çурт кĕрет. Вăл шутра Туçари нумай хваттерлĕ - 3, Первомайскинчи - 2, Красномайскинчи 1 коммуналлă çурт та пур. Йĕрке тăрăх çĕнĕ компани управляющине палăртнă хыççăн 20 кун хушшинче хваттерсен хуçисемпе килĕшỹ тумалла. Халĕ шăпах çак ĕç пырать.

Нумай хваттерлĕ çуртсене тытса тăрас тата вĕсене юсас тĕлĕшпе пĕр тăваткал метршăн 16 тенкĕ укçа тỹлемелле. Анчах та кунта çакна та палăртса хăвармалла. Хваттерсен хуçисем, çав çуртра пурăнакансем ăна йỹнетме, хăш-пĕр çăмăллăха хăйсен вăйĕпе пурнăçлама пултараççĕ. Сăмахран, подъездсене çуса тăрасси, çурт умĕнчи курăксене çулса тăрасси, хĕлле юр тасатасси тата ытти те.

Хальхи вăхăтра кỹршĕ муниципалитет округĕсенче те нумай хваттерлĕ çуртсен управленине тăвас ĕç пырать. Паянхи кун коммуналлă хуçалăх ыйтăвĕсене кирлĕ пек йĕркелесе пырас, хамăр пурăнакан вырăна тирпейлĕ те таса тытас тĕллевпе çакнашкал организаци кирлех.

Альбина ЕГОРОВА çырса илнĕ