Патăрьел муниципалитет округĕн администрацийĕн ларусем ирттермелли залĕнче Халăх пĕрлĕхĕн кунĕ çывхарнă май çамрăксен пĕрлешĕвĕсен хастарĕсем çавра сĕтел хушшинчи мероприятие хутшăнчĕç. Муниципалитет округĕн пуçлăхĕ Рудольф Селиванов вĕсенче пысăк шанăç тăнине, каччăсемпе хĕрсем аслă ăрурисен йăли-йĕркине малалла тытса пынине, тĕрлĕ наци халăхĕ пĕрлĕхре пулса умри тĕллевсем пурнăçланнине палăртрĕ. Ĕçлĕ визитпа Юхмапа Пăла тăрăхне килнĕ республикăри ĕç тата социаллă хỹтлĕх министрĕ Алена Елизарова çĕршывăн вăйĕпе хăвачĕ шăпах халăхсен çирĕп туслăхĕнче тăнине каларĕ. Ыхра Çырминчи истори учителĕ Альфия Сабирзянова çĕршыв историйĕпе паллаштарчĕ. Çавăн пекех муниципалитет округĕн администрацийĕн пуçлăхĕн социаллă ыйтусемпе ĕçлекен çумĕ Светлана Чернова, çамрăксемпе ĕçлекен канашçи Юлия Селиванова, "Движение первых" юхăмăн вырăнти представителĕ Зоя Михайлова, Патăрьелĕнчи "Çăкăр" музейĕн экскурсовочĕ Наталия Румянцева, Турă амăшĕн Державная иконĕ ячĕллĕ чиркỹ настоятелĕ Александр Синяков иерей, Чăваш Республикинчи мăсăльман тĕн управленийĕн муфтийĕн пĕрремĕш çумĕ Ильяс Сафиянов сăмах илчĕç. Пурте патшалăх тĕрекĕ халăхсен пĕрлĕхĕнче пулнине палăртрĕç.

Альбина АСТРАХАНЦЕВА