ЮХМАПА Пăла тăрăхĕнче паллă спортсменсен ячĕпе тĕрлĕрен турнир ирттересси ырă йăлара. Вĕсенчен пĕри - кире пуканĕ йăтассипе тăван район тата республика чысне çирĕм çул ытла хỹтĕленĕ, вăтăр хутчен Чăваш Ен рекорчĕсене çĕнетнĕ Федор Моисеева асăнса йĕркелекен турнир. Паттăр енсен пăхаттирĕ 1962 çултах республика чемпионĕ ята çĕнсе илнĕ. Ун хыççăнах хăйĕн ăсталăхне Мускавра Пĕтĕм Союзри халăх хуçалăхĕн çитĕнĕвĕсен куравĕн (ВДНХ) арени çинче ирттернĕ пысăк турнирта кăтартнă.

 Федор Петрович тахçантанпах ĕнтĕ пирĕн хушăмăрта çук. Çапах та Патăрьелсем районти апат-çимĕç комбиначĕн директорĕнче ĕçленĕ сумлă та пархатарлă, вăйлă та сăпайлă çынна манăçран кăлармаççĕ, 1988 çултанпа кашни çулах ăна асра тытса турнир ирттереççĕ. Ырă йăлана малалла тăсса ноябрĕн 11-мĕшĕнче Патăрьелĕнчи "Паттăр" спорт шкулта Федор Моисеев ячĕпе кире пуканĕ йăтакансен республика турнирĕиртет. Вăл 10 сехетре пуçланать.