УШКĂН вăйĕ кирек мĕнле йывăрлăха çĕнтерме те пулăшать. Сăкăт территори пайĕнче пурăнакансем хăйсен ентешĕсем Украинăри ятарлă çар операцине хутшăнакан çар чаçне гуманитари пулăшăвĕ çитерес тĕллевпе пĕр талăкра 350 пин тенкĕ укçа пуçтарнă. Культура çурчĕн заведующийĕ Вероника Кузнецова хаçат редакцине пĕлтернĕ тăрăх, сăваплă ĕçе ялти организаци-предприяти коллективĕсем, "Красное Знамя" хуçалăх тата унта тăрăшакансем, уйрăм хастарсем, çемьесем пĕр çын пек кар тăрса хутшăннă, салтаксене çапăçусенче усă курма хăватлă дрон туянса вырăна çитернĕ.

Çавăн пекех Нăрваш Шăхаль территори пайĕнче пурăнакансем те Украинăри ятарлă çар операцине хутшăнакан ентешсем валли Раççей почти урлă кучченеçсем, ăшă тумтир, саламлă çырусем тата ытти те яраççĕ. Çак кунсенче çеç вуншар килограмлă пилĕк посылка салтаксем патне çитнĕ.